महोत्तरी – राष्ट्रिय स्वतन्त्र पार्टी (रास्वपा) सम्सी गाउँपालिका कमिटीले गाउँपालिकाको कार्यालय हाल सञ्चालन हुँदै आएको स्थानबाट सारेर श्री जनता माध्यमिक विद्यालयको नवनिर्मित भवनमा सञ्चालन गर्ने तयारीप्रति आपत्ति जनाएको छ ।

रास्वपा सम्सी गाउँपालिका सभापति मो. मोअज्जम रफिद्वारा हस्ताक्षरित विज्ञप्तिमार्फत विद्यालयका लागि निर्माण गरिएको भवनलाई प्रशासनिक कार्यालयका रूपमा प्रयोग गर्ने तयारी तत्काल रोक्न माग गरिएको हो ।

विज्ञप्तिमा शैक्षिक संस्थाको वातावरणमा स्थानीय सरकारको प्रशासनिक कार्यालय सञ्चालन गर्दा विद्यार्थीको पठनपाठन प्रभावित हुन सक्ने उल्लेख गरिएको छ । विद्यालय परिसरमा प्रशासनिक गतिविधि सञ्चालन गर्दा शैक्षिक वातावरणमा असर पर्नुका साथै विद्यार्थीको नियमित पठनपाठनमा बाधा पुग्ने रास्वपाको दाबी छ ।

रास्वपाले विद्यालय भवनलाई अन्य प्रयोजनमा प्रयोग गर्नु अव्यावहारिक भएको जनाएको छ । साथै गाउँपालिकाको कार्यालयलाई हालको स्थानबाट अन्यत्र सार्दा सर्वसाधारण सेवाग्राहीलाई कार्यालयसम्म पुग्न थप समस्या र प्रशासनिक झन्झट उत्पन्न हुन सक्ने विज्ञप्तिमा उल्लेख छ ।

“शैक्षिक संस्थाको वातावरण विथोलिने र आम जनताको सहज पहुँचबाट गाउँपालिकाको कार्यालयलाई टाढा लैजाने गरी गरिएको निर्णय सराहनीय छैन,” विज्ञप्तिमा भनिएको छ ।

रास्वपाले स्थानीय सरकारको कार्यालय र विद्यालयका लागि निर्माण गरिएको पूर्वाधारको उपयोग गर्दा विद्यार्थी, शिक्षक तथा सर्वसाधारण सेवाग्राहीको हितलाई प्राथमिकतामा राख्नुपर्ने जनाएको छ । विद्यालय भवनलाई प्रशासनिक प्रयोजनमा प्रयोग गर्ने निर्णयबारे पुनर्विचार गरी कार्यालय सार्ने प्रक्रिया तत्काल रोक्न पनि पार्टीले माग गरेको छ ।

विज्ञप्तिमा स्थानीय जनभावना र सरोकारवालाको हितविपरीत निर्णय फिर्ता नगरिए संघर्षका कार्यक्रम अघि बढाउने चेतावनीसमेत दिइएको छ ।

यता, गाउँपालिकाले विद्यालयको नवनिर्मित भवनलाई कार्यालयका रूपमा प्रयोग गर्ने तयारी गर्नुको कारण, कार्यालय स्थानान्तरणको आवश्यकता तथा निर्णय प्रक्रियाबारे गाउँपालिका नेतृत्वको विस्तृत आधिकारिक धारणा सार्वजनिक हुन बाँकी छ ।

विद्यालयका लागि निर्माण गरिएको भवनको प्रयोग र गाउँपालिका कार्यालय स्थानान्तरणको विषयमा स्थानीयस्तरमा विवाद देखिएपछि यसले शिक्षा र स्थानीय सेवा प्रवाह दुवैसँग सम्बन्धित विषयलाई बहसमा ल्याएको छ ।